أمي ملهاش في السياسه

من طرف **احمد السيد** الإثنين فبراير 14, 2011 6:27 pm

شايفه يامٌه الغُلب والشقا اللي مالي الوشوش
واللي قاعدين عالقهاوي وطلع علامهم على فشوش
قالتلي [ندعوك للتسجيل في المنتدى أو التعريف بنفسك لمعاينة هذا الرابط]يابني ماتبعد وكفايه حكاوي في السكه ديه
مالك انتا ومال اللي عالقهاوي ومال غُلب الفواعليه
وانتا مالك بالبلد يعني كلهابقت حريم وانتا بس اللي ولد
ولا انتا عايز تتشد وتنجلد؟
شوفتي يامٌه حرق دمي على ابويه يوم ممات
اهو انا اللي فيه دا كلٌو من كُتر السُكات
عايز أصرخ في الميدان
نفسي اصرخ في الميدان بعلو صوتي واقول تعبان
والله تعبان.......كلمه على لساني
واعمل ايه في كتماني اللي خلاني خايف وعاجز اعدي الصور
زرعو الشوك في بستاني...وبكو الورد احزاني...وخلونا يامٌه كسور
سرقو مني احلامي ومبقتش شايف قدامي
ومبقتش شايف في الضلمه نور.......ومبقتش شايف في الضلمه نور
يعني هو مكتوب عليٌ قلة نومي يعني من عدل الدنيا يكلو هما وانتي تصومي
شايفه الشقا يامٌه والعَجَز على وشي
شايل همي جوه هدومي م التعب مش عارف امشي....من خوفي عليكي بداري همومي
صعبت عليكي يامٌه ودلوقتي نزلت دموعك......ضميني يامٌه
ضميني يامٌه خديني بين ضلوعك.....خديني في حضنك مفيش أئمن منه
لولا إن الرجوله منعا البُكا بس الواحد غصب عنه
مهو انا لو مصرختش ممكن اموت...مهو انا لو مقلتش هينطق السكوت
سألونا من ايه الوجع قلنا الوجع منهم
مين اللي عاش اتخدع وداق الذل من ويلهم...مين اللي اتذل وخضع وشايف ليلهم
احنا اللي وطينا سنين ونستاهل اللي يجرالنا
بس احنا بنآدمين وهو دا حالنا
حالنا يامٌه دلوقتي ........
الميه مصفره وطيرنا فيه فِره والميه مقطوعه
واللي بيهج بره واللي مش لاقي مبره يتعالج من امراض ممنوعه
غير الزحمه في كل الشوارع غير اعتصامات المصانع
لا والله لو يحسو بكلامنا مره ويشوفو أد ايه العيشه مُره.....أكيد قلبهم هيحن
بس دا من رابع المستحيلات...طب دنا ليٌ واحد صحبي قال في مره الحق مات
طب انا بقى مش قادر اصبر عالسُكات
في اللي جي وفي اللي عدا وفي اللي فات كل يوم بيألمني السُكات
وكل يوم بحلم بصحبي اللي مات..كل يوم بحلم بذُل اخويا وصحبي اللي مات
نفسي انزل في الميدان..نفسي أصرخ واقول تعبان..نفسي اصرخ من الجنان
عارفه يامٌه
زي ميكون نسيت اصلي واسمي..زي ميكون مش حاسس بجسمي
عارفه يامٌه الخوف حاضني ومن بين حيطان السجون ساجني
عايزه تبكي يامٌه على حالي هتبكي لما تشوفي اللي جرالي
ابكي على حالي وشوفي ملامحي..حسي جرحي في كسر قمحي
ابكي على حالي وانا جندي مقتول برصاص الصهاينه عالحدود
ابكي على حالي لما هان عليهم دمي وتعب جدود الجدود
ابكي على حالي لما مدو ايدهم لليهود..ابكي على حالى في الوضع الحالي
يعني مش هقولك غزه وفلسطين .. لأ
ولا هقولك مين اللي نهبو.. ومين اللي سرقو.. ومين اللي حرقو..
ومش هقولك مين الي طلعو كمان واطيين
بس هحكيلك عاللي في المستشفى مرميين
واللي بياخد بالغلط كيماوي واللي جسمه مليان بلاوي واللي قاعدين عالأهاوي مستنيين الدور يدور
غير اللي بيتراضى بقرشين عشان يمشي مصلحه
وان فهم انه مش هيدفع يحلف ماتمشي المصلحه
واللي من الحر اتخنق واللي مش لاقي يجيب مروحه
واللي في الزحمه اتسلق والزحمه حلفت ماهي مروحه
واللي واللي كتير كتير
واللي شاربين من قله واللي ليهم الف بير
واللي في بطنه فلوس حرام تحت البلاطه وتحت السرير
واللي واللي كتير كتير
كل اما بص في المرايا يامٌه ألاقيني مطحون في الرحايا
وشعري شاب بدري .. وجوايا خيبة أمل بتقوللي لسه عالجواز بدري
عارفه يامٌه لو اللي جاي على قد اللي رايح
كنا أكلنا كل شهر لحمه بلدي..كنت هاخد مع الفرح وادي
كنت هبيع الخوف وهمومي واعيش راضي وعلى قدي
بس ياريت اللي جاي مكفي اللي رايح
رايح حقي وتعبي فيها .. دول حراميه وقعدو عليها
رايح حقي وتعبي فيها .. دول حراميه وقعدو عليها
معلش يامٌه دوشتك...عارفك ملكيش في السياسه
بس اعمل ايه في ناس مافيهاش ريحة الحساسه
ناس ياما لزقت وعششت في الرياسه
وخلونا نِسف تراب واتهمونا بالنجاسه
وانا وامي مش بناكل حرام ولا بنبيع خساسه
أنا بس بقول الحق في كلام..وامي ملهاش في السياسه
امي ملهاش في السياسه